Vastelaovesvereniging De Kwakkert

Klik bovenin om uch keuze te make:

Koelekop Archief

Femke I; Jeugdprinses 2022-2023

'Bie VIOS aan de bal, met noe Vastelaoveskal!!!'

Zaoterdigaovendj waas d'r eine échte primeur te belaeve op 't podium bie de Bombardon.
Allerieërst waerdje d'r eine gloednuje jeugdraod aan de Heitser minse väörgesteldj. Daonao noom Sarah Heynen de scepter äöver van Vorstin Emma. Sarah is de twieëdje Vorstin van de Koeleköpkes. Mer toen…
Naodèt 57 jeugdprinse de scepter höbbe gezweijdj äöver 't Koeleköpkesrieëk, waerdje Femke I oetegerope as allerieërste Jeugdprinses. Gans gruuëts sting ze op 't podium.
Femke fietstj eder daag nao Häör nao sjoeël. En as wae de proklamasie moge geluive is det edere kieër weer ein hieël belaevenis. In häöre vrieje tied goejtj ze ein belke bie de C1 van handjbalvereiniging VIOS.

Femke I haet uiteraard de steun van häöre Jeugdraod. Mer ouch van häör adjudante. Femke haet Pien Verkoulen en Semm Vestjens gevraogdj of ze häör adjudante woje zeen. En as echte gooj vriendinne zagte zie natuurlik geliek 'jao'.

Femke is de jóngste dochter van Roel Verheijden en Monique Vermeulen. Gein onbekindje gezichte in de Heitser vastelaovendj. En as de jóngste dochter bès, höb se natuurlik ouch nog eine aojer zöster. Des is Fleur.

De receptie van Jeugdprinses Femke I en groeëte Prins Marcel I waertj op zaoterdigaovendj 11 fibberwarie 18:49 gehaoje in de Bombardon in Heitse.

Stan III; Jeugdprins 2019-2020

'Inne goal neet te verslaon, noe Heitse oppe kop laote staon'

Woeë 't aan liktj weite we neet, mer det voetbalkeepers gooj kandidate zeen óm Prins te waere, bliektj waal oet de versjillendje Prinse die de aafgeloupe jaore bie ós vereiniging dit ambt höbbe móge bekleije. Ouch dit jaor is 't weer pries. Stan III Hovens, zoon van Sander Hovens en Ellen van Roij waerdje op zaoterdag 23 november as Jeugdprins geïnstalleerdj. Door de waek, as Stan neet zien Prinsepak aan haet, geit d'r nao groep 8 oppe Neerakker. Dus neet allein ein belangriek jaor as Prins, mer ouch op sjoeël ein belangriek jaor. Boete de scepter zweije voetbaltj Stan gaer en vintj d'r 't leuk óm te game. Mer ouch oppe fiets, BMX'e, bringtj d'r ziene vrieje tied door, al mót d'r det de kómende maondje mer efkes achterwaeges laote, want det is väöl te gevierlik as Jeugdprins. Stan regeert äöver 't Koeleköpkesrieëk ónger ziene liefspreuk:
'Inne goal neet te verslaon, noe Heitse oppe kop laote staon'.

Stan III haet uiteraard de steun van ziene Jeugdraod. Mer ouch van zien adjudante. Stan haet Fabian Colbers en Mats Corbey gevraogdj of ze zeen adjudante woje zeen. En as echte gooj vrunj zagte ze natuurlik geliek 'jao'.
De receptie van Jeugdprins Stan III en groeëte Prins Bart II waertj op zaoterdigaovendj 15 fibberwarie gehaoje inne Bombardon in Heitse.

Lars II; Jeugdprins 2018-2019

'Mèt dees daag höb ích 't lètste waord'

Lars Nieskens zal dit jaor väörop gaon inne polonais van de Heitser jeugd. Lars (Nieskens) geit, as d'r gein vakantie haet, in Heitse nao 't VMBO. In ziene vrie tied släöteltj d'r gaer aan brommers. Rieje dao'op moog d'r nog neet. Lars kumtj oet ein groeët gezin. Net geine ganse Raod van Elluf, mer 't geit d'r waal hèl op aan. Same mèt zien pap en mam, breurkes en zösters zeen ze thoes mèt zien achte. As se dao de hunj, katte, knieën en hoonder bie optels, geis se wiet äöver de elluf haer. Det Lars toet Jeugdprins waerdje oetgerope waas al ein verrassing, mer ein nog groeëtere verrassing waas 't oetrope van eine nuje Jeugdvorst, of baeter gezag, Jeugdvorstin. Emma I zal de kómendje twieë jaor de Jeugdprins vanne Kwakkert óngersteune mèt häöre alwieze raod. De ieërste vrouwelikke Vorst inne gesjiedenis vanne Kwakkert. Eine vrouwelikke Vorst, gekoppeldj ane liefspreuk van Lars II; 'Mèt dees daag höb ích 't lètste waord'…. Wae höbbe d'r alle vertroewe in det det gans geit goodkóme.

Kris Bergs en Tijn Vossen en zulle Jeugdprins Lars II assisteren as adjudanten.
De Jeugdraod besteit dit jaor oet: Kjelle Zegveld, Kyra Hanssen, Dana Rooswinkel, Fabian Colbers, Dave van Horne, Kyan Rooswinkel, Tuur Verkoulen, Isa en Kim Loyen, Ruben van Rooyen en Niels Kurstjens.
Op zaterdigaovendj 23 fibberwarie zal Lars zien receptie haoje inne Bombardon.

Noud II; Jeugdprins 2017-2018

Lètste man in 't veldj, mer mèt dees daag väörop in 't Koelekopgeweldj'

Aafgeloupe zaoterdig waas 't weer zoeëwiet, 't jaorliks trökkierendje Prinsebal van ós vereiniging. Wie gebroekelik de letste jaor is 't ieërst de bäört ane jeugd van Heitse. En ein klein bietje speciaal waas 't dit jaor waal ómdèt de 5x 11e Jeugdprins vanne Koeleköpkes gepresenteerdj waerdje. Óm de spanning get op te veure waerdje ieërst de nuje Jeugdraodsleje gepresenteerdj. Väör de nuje Jeugdprins doordje det natuurlik allemaol get lang, mer ouch eine Jeugdprins mót gewuuen op zeen bäört wachte. Wie det allemaol plaats haaj gevondje waas 't den zoeëwiet.

Noud Corbey haaj lang genóg mótte zwiege en noe moog ederein 't weite. Noud II, zoon van Chantal Schoordijk en Joep Corbey, aojere broor van Mats, is dé nuje Jeugdprins vanne Kwakkert.

Noud geit in Häör nao 't VWO en in 't weekend voetbaltj d'r als letste man inne D1 van Heitse, wat ouch oet ziene liefspreuk veltj op te make, 'Lètste man in 't veldj, mer mèt dees daag väörop in 't Koelekopgeweldj'. Boete de Jeugdraod zal Noud II waere biegestandje door twieë adjudante, Sil Backus en Jonah Joris die 't vastelaovesblood ouch neet van vraemdje höbbe. Det geit dus hielemaol good kóme mèt de Jeugdvastelaovendj in Heitse.

De receptie van Jeugdprins Noud II is op 3 fibberwarie 2018, same mèt de Groeëte Prins.

Tjeerd Coolen, Koeleköpke van 't Jaor 2018

Ein good gebroek van ós Prinse is óm op kraamvisite te gaon bie 't kiendje det as ieërste nao 11 november is gebaore en woeëvan de aojers ein gebaortekaertje inne brevebös vanne Kwakkert höbbe gedaon.

Dit jaor veltj Tjeerd Coolen dees ieër te bäört. Tjeerd is 't ieërste kiendje van mooder Laura Vissers en vader Geert Coolen. Tjeerd is inmiddels geridderdj door Prins Bas I en Jeugdprins Noud II. Daomèt moog Tjeerd zich offisjeel 'Koeleköpke van 't Jaor' numme.
Wae winse Tjeerd, Laura en Geert hieël väöl gelök same.

Twan I; Jeugdprins 2016-2017

Mèt Twan as Prins, geis se toe des se neet mieër kins!!!

Neet allein eine nuje Jeugdprins mèt zien adjudanten, mer ouch eine nuje Jeugdvorst én eine compleet nuje Jeugdraod waerdje gepresenteerdj aan 't Heitser publiek. Haje we väörig jaor al twieë vrouwlikke adjudante, dit jaor waertj de Jeugdraod, wat doorgaons ein mannebolwerk is, aangevuldj mèt ein paar sjoeën maedjes. Naodèt ze ederein gepresenteerdj waas waas 't eindelik de bäört ane nuje Jeugdprins.

Twan Joosten kwoom achter de gerdiene oet as dé nuje Jeugdprins vanne Koeleköpkes. Twan is de zoon van Baer en Bertine Joosten. Gein onbekindje in de Heitser vastelaovendj. Twan luptj same mèt zien vader al jaore mèt d'n optocht mèt. Mer dit jaor mót Baer dus efkes allein loupe, want Twan waertj geraeje… Twan I steit natuurlik neet allein op 't podium. Thomas Graef en Lauren de Bock, twieë gooj vrunj zeen zien adjudanten terwiel Vorst Nick Mulders as spraekstalmeister zal fungere.

Twan I ziene liefspreuk is: "Mèt Twan as Prins, geis se toe des se neet mieër kins!!!"

Inkele jaore gelaeje was Twan Jeugdprins bie ós collega-vereiniging De Fieëstnaze vanne Hei. Aan ervaring, ouch hieë dus gein gebrek. In ziene vrie tied, dae d'r de kómendje maondje weinig zal höbbe, voetbaltj Twan bie de C1 en speeltj d'r gaer oppe Playstation. Foto's

Kinjer Bóntje Middig

Nao 't geweldige succes van väörgaondje jaore organiseertj De Koelekop ouch dit jaor weer de Kinjer Bóntje Middig. Dit jaor op zaoterdig 4 fibberwarie. Mer väör dit geweldige fieëst höbbe wae artieste nuuedig. Eine eine verseerdje zaal, eine goje presentator en ein geweldige meziekkepèl, det is neet genóg. Dao zeen ouch artieste väör nuuedig. Wae weite zeker des se thoes waal ins stiekem väör de spegel oppe badkamer ein dansje höbs gedaon. Noeë is dien kans óm ins ein échte ster te zeen.

En zoot se waal wille, mer doe höbs gein good idee? Gein probleem. Wae höbbe eine klapper vol mèt leedjes, acts, dansjes etc. etc. Väör ederein zitj d'r waal get bie. Dus, twiefel neet langer, gaef dich op. Väör mieër informatie bel of mail met Lieke Vullers, / 06 27 44 75 97. Of duj gewuuen ein breefke in de brevenbös bie Lieke, Doctor Poelsaan 15. Sjrief d'r waal efkes op was se geis doon en mèt wieväöl vriendjes of vriendinnetjes.
En vergaet neet oze promo (gemaaktj door Jeroen Stultiëns), te bekieke.

Pleun Verschueren; Koeleköpke van 't Jaor

'T kós ouch moeilijk angers!!!
'T kindje van eine aod Jeugd- en Groeëte Prins én ein écht Heitser maedje mós waal Koeleköpke van 't Jaor waere. En zoeë gebäördje ouch. Pleun Verschueren waerdje gebaore op 29 november. Pleun is de dochter van Teun en Anne-Marie Verschueren. Wie gebroekelik, haet 't Koeleköpke inmiddels bezeuk gehadj van Jeugdprins Twan I en Groeëte Prins Martin I. Zie höbbe Pleun geridderdj en de aojers in 't zunke gezette.

"Jente I; Jeugdprins vanne Koelekop 2015-2016".

"Mèt dees twieë maedjes aan mien zie, bèn ich van de partie".

Op zunjig 22 november 2015, zoe rondj de klok van drie, leep de spanning duchtig op in De Bombardon in Heitse. Achter de coulisse stinge twieë kaerels die dalik oetgerope zoje waere as Jeugd- en groeëte Prins van De Kwakkert. Als ieërste waas 't de bäört aan de Koeleköpkes. Ónger toezeendj aog van de jeugdraod, kwoom Jente Voermans nao väöre als häöre nuje Jeugdprins. Jente is de zoon van Roland en Karin Voermans en breurke van Daphne. Mer Jente I haaj ouch nog eine waereldprimeur väör Heitse. Väör 't ieërst staon d'r twieë vrouwelikke adjudante naeve 'm. Anke Rutten en Jade de la Bretoniere zulle Jeugdprins Jente I gedorendje de ganse vastelaovendj assistere woe ze mèr kinne. Jente zal äöver 't Koeleköpkes-rieëk regere ónger ziene liefspreuk "Mèt dees twieë maedjes aan mien zie, bèn ich van de partie".

Prinse op bezeuk bie Koeleköpke van ’t Jaor.
Aafgeloupe waek zeen Prins Niels I en Jeugdprins Jente I op kraamvisite geweest bie Cas Tummers, Koeleköpke van ’t Jaor.

Det Cas zich op zien gemaak veultj bie ós Prinse bleek waal, hae haet de ganse tied geslaope… Zusje Saar daointaege, waas deep ónger de indrök en haaj een sjoeën teikening gemaaktj väör de Prins. Nao de besjuut mèt muueskes mós Cas, zusje Saar en aojers Wim en Anke, natuurlik oppe foto mèt Niels en Jens.

Kinjer Bóntje Middig vanne Koelekop Heitse 2016
Op 16 jannewarie organiseren wae, alweer väör de viefdje kieër, de Kinjer Bóntje Middig. Eine hieële leuke middig väör kinjer, mer ouch väör de papa en mama's, opa en oma's.

Waem wiltj d'r noe neet 'ns efkes hieël beroemdj zeen. Nou, noe kries se de kans! Wil se een leuke tonieëlstökske doon, een grappige sketch op de bühne bringe, ein leedje zinge, ein k'nienke laote verdwiene of ein danjse doon, griep dien kans. En zoot se waal mèt wille doon, mer höb se gein idee? Gein probleem. Wae höbbe eine klapper vol mèt leuke ideetjes. Dae zitj väör ederein get bie en wae helpe dich zoeëdet ederein de kans kriegtj óm ins op ein échte bühne te staon, mèt eine échte microfoon en professioneel leecht. Wae regele alles väör ós artieste. En, o jao, doe hoofs écht gein plat te kinne kalle!!!

Höb se noch vraoge of wil se dich noe al opgaeve. Neem den contact op mèt . Bellen kan natuurlik ouch, 0475 57 41 45 of 06 51 86 12 55. Of stop ein breefke in de brevebös bie Rik, Akker 22. Sjrief d'r waal efkes op was se wils gaon doon en mèt wieëväöl vriendjes of vriendinnetjes se mèt wils doon.

En vinj se allein leuk óm te kóme kieke…, det kan natuurlik ouch. Want zónger publiek vinje de artieste d'r niks aan. Op 16 jannewarie geit óm 14.00 oor de zaal aop.

"Quin I; Jeugdprins vanne Koelekop 2014-2015".

Op zunjigmiddig 23 november waerdje rondj de klok van 14.11 oor Quin Frenken oetgerope as 52 Jeugdprins van De Kwakkert. Quin I is de zoon van Hans en Miriam Frenken en breurke van Lenn.

Jeugdprins Quin I zal äöver de Koeleköpkes regere mèt ziene liefspreuk " 'T is zoeë wiet, väör game geine tied, want 't daak geit d'raaf met Prins Quin I, Heitse ALAAF".

Quin I zal geassisteerdj waere door twieë adjundate, te weite Daan Heerschap en Cas Peeters.
Neet allein eine nuje Prins, mer ouch eine nuje Vorst haaj de jeugd van Heitse nuuedig. En dae kwoom d'r. Daan Caris zal de komendje jaore 't Vorstsjap väör zien raekening neme. Quin zitj in 't letste jaor vanne basissjoeël. Game en braekedance zeen groeëte hobby's van Quin.

Jeugdprins Koen I van de Koelekop 2013-2014
Zunjig 5 jannewarie waerdje oze nuje Jeugdprins oetgerope. Naodet de Raod van Elf Jeugdprins Noud I thoes haaj opgehaoldj, ging de hieële meute ónger leiding vanne Borekepèl richting Kwakkertepool.

Uiteraad waas 't ieërste, en det waas ouch geliek zien letste as Jeugdprins, waord väör Noud, dae op gepasje wijze aafsjied noom. Wieë alle offisjiele plichtplegingen achter de rök wore, waas 't hoeëg tied väör de nuje Jeugdprins. Naodet de spanning good waas opgebouwdj kwoom Koen Schroijen nao väöre as nuje Jeugdprins. Koen I, zoon van Roul en Monique Schroijen en broor van Femke zal de Koelekop dit jaor aanveure.

Same mèt Jeugdvorst Dani en zien adjudante Giel Seunis en Martijn Frenken doordje 't neet lang, enne Kwakkertepool sting oppe kop. Ónger ziene liefspreuk "De juuste snaor geraaktje, van eine Kaker eine Koelekopprins gemaaktj", zulle wae Koen dit jaor good lieëre kinne.
Nao alle officiële zake aafgehanjeldj te höbbe, brach Koen I ziene eige Heitser Slager ten gehuuere. Mèt "Ich smiet slók" kreeg d'r de ganse Kwakkertepool aan 't springe. Mèt deze nuje Jeugdprins en zien gevolg belaoftj ouch dit vastelaovesseizoen weer ein fantastisch jaor te waere väör de Heitser jeugd.
Foto's kintj gae hie bekieke

Kinjer Bóntje Middig 2014
In 't Bóntje Wiekend van 7 en 8 fibberwarie is 't inmiddels ein good gebroek gewaore det de zaoterdigmiddig in 't teiken steit vanne Heitser jeugd, oftewaal de Koeleköpkes. Woeë 's-aoves de groeëte minse bezit neme vanne bühne, is 't op zaoterdigmiddig 8 fibberwarie ane Heitser wichter óm hun artiestieke talente ane minse te laote zeen.

Ederein moog mèt doon. Groeëte en kleine wichter, allein of mèt ein vriendje of vriendinnetje, of missjien waal same mèt opa of oma. Zoot se waal mèt wille doon, mer höb se gein idee. Gein probleem. Wae höbbe eine ganse klapper vol mèt leedjes, sketches, trucjes en nog väöl mieër. Waem wiltj noe neet ins op ein échte bühne staon mèt écht leecht, eine échte microfoon en mèt écht publiek? Noe is 't dien kans. Missjien bès dich waal de nuje Bassie of Adriaan, of de nuje Hans Klok? Griep dien kans en doot mèt.
Wil se mieër weite of wils se dich opgaeve? Mail den nao Rik Caris of bel Rik gewuuën op: 06-51 861 255. En kiek ouch efkes nao de promo vanne Kinjer Bóntje Middig 2014 op Youtube

Foto's van de Kinjer Bóntje Middig

Kinjer Bóntje Middig vanne Koelekop Heitse 2013
Daag en nacht höbbe ze geoefendj väör de Twieëdje Kinjer Bóntje Middig op zaoterdig 19 jannewarie. De kinjer höbbe d'r nao 't succes van väörig jaor zin in. D'r waerdje gedanstj, gezónge en allerlei angere leuke dinger gedaon. De nuje Raod van Elf, ónger leiding van Jeugdprins Noud I haet alles in gooj bane geleidj mèt zien toenieël-stökske.
De Jeugdharmonie haet väör de meziek gezorgdj.
't waas ein groeët fieëst woeë jónk en aod zich duchtig höbbe geamuseerdj.
Zónger chips gein fieëst...! Daorom krege alle kinjer ein zekske chips gratis. En alsof det noch neet genóg waas; twieë gratis kaertjes väör Toverland ware te winne. 't waas ein groeët fieëst.

Foto's van de Kinjer Bóntje Middig en Youtube.

Jeugdprins Noud I van De Koelekop 2012-2013
Op zunjig 6 jannewarie waerdje in eine bomvolle Kwakkertepool neet allein de nuje Jeugdprins vanne Koelekop oet Heitse oetgerope. Nae! Ouch waerdje d'r eine compleet nuje Jeugdraod en eine nuje Vorst gepresenteerdj. Eine sjoeëne groep frisse, jóng hunj die väörop gaon gedorendje de vastelaovendj. Allerieërst waerdje d'r eine nuje Vorst geïnstalleerdj. Dani Raemakers zal de komendje twieë jaor de Prins biestaon. Nao de installatie van Dani waas 't groeëte moment dao. Noud van Lier, oftewaal Noud I, waerdje gepresenteerdj as de nuje Jeugdprins vanne Koelekop. Noud is de jóngste zoon van Joep en Hetty van Lier en broor van Tom. Gein onbekindje femilie inne vastelaoves-scene van Heitse. Joep waas vaorig jaor groeëte Prins vanne Kwakkert en Tom was ein paar jaor geleje adjudant vanne Jeugdprins. Noud kumptj dus oet ein good nèst. Daonao stèldje Noud zeen adjudante väör, Rik Peters en Joost Winkelmolen. En "last but not least" elf nuje raodsleje.

Nao alle officiële zake aafgehanjeldj te höbbe, brach Noud I ziene eige Heitser Slager ten gehuuere. Mèt "Waem wètj waat eine Koelekop duit" kreeg d'r de ganse Kwakkertepool aan 't springe. Mèt deze frisse groep jóng hunj belaoftj ouch dit vastelaovesseizoen weer ein fantastisch jaor te waere väör de Heitser jeugd. Óngerstaondj Noud I zeen Proklamasie.

Koeleköpke van 't Jaor 2012
We höbbe d'r weer eine… 't Koeleköpke van het Jaor is gebaore.
Roy en Lianne Stultjens zeen de trotse aojers gewaore van Maarten. Maarten moog deze titel 't ganse jaor mèt zich mèt drage. Inmiddels höbbe de groeëte Prins en de Jeugdprins vanne Kwakkert Maarten en zeen aojers in 't zunke gezatte. Ein reportaasj hieëvan kintj gae hieë zeen.

Sil de 1ste, Jeugdprins vanne Koelekop 2011-2012
Aafgeloupe zunjig waerdje in eine bomvolle Kwakkertepool de nuje Jeugdprins van De Koelekop oet Heitse oetgerope.
Naodet Jeugdprins Coen I ederein bedanktj haaj in zien aafsjiedswäördje waas 't tied óm plaats te make väör de nuje Jeugdprins.

Op ein spectaculaire meneer kwoom Sil teväörsjien als dé nuje Jeugdprins. Sil geit 't vastelaoves-seizoen neet allein in. Hae kintj raekene oppe steun van ziene vorst Timo I, zeen twieë adjudante Djarno en Teun en natuurlik ziene Raod van Elf.

Det Sil oet ein echte vastelaovendj-femelie kumtj zeen we al aan ziene liefspräök; "Mien broor ging ieërst väörop, mer noe bin ich Prins vanne Koelekop". Zien broor Juul waas in 2007 Jeugdprins in Heitse en toen waas al dudelik det d'r in Sil eine goje Jeugdprins "s-juul-dje".

Gister waas 't den eindelik zoeëwiet. Nao alle officiële zake aafgehanjeldj te höbbe, brach Sil I ziene eige Heitser Slager ten gehuuere. Mèt "Spring ins…" kreeg d'r de ganse Kwakkertepool "aan 't springe". Ouch mèt deze Jeugdprins belaoftj 't weer eine sjoeëne Jeugdvastelaovendj te waere.

Klik hie väör de plaetjes en hie väör zien leedje

Kinjer Bóntje Middig vanne Koelekop Heitse 2012

Koeleköpke van 't Jaor 2011
Toepasselikker haaj 't neet gekósj; Op ein veelvoud van 11 is 't Koeleköpke van 't Jaor gebaore.

Op 22 november is Vinn Nelissen gebaore en daomèt moog hae deze titel ein gans jaor lang drage. De trotse aojers zeen Hugo Nelissen en Marlou Evers.

Vinn is 't breurke van Sven. Binnekort zulle Prins Joep I en Jeugdprins Coen I same op kraamvisite gaon en de felicitaties van v.v. De Kwakkert officieel äöver gaon bringe. Vanaaf dees plaats wille wae noe alvast de ganse femilie eine dieke proficiat winse.

Oetslaag Pleebek Sjoow
Op zunjig 23 oktoeber 2011 ging 't daak d'raaf bie de Pittt. En den te bedinke det de Pittt inne kelder vanne Zaal liktj…

't Waas eine geweldige sjoeëne middig woeëbie alle artieste d'r eine geweldige show van höbbe gemaaktj. De jury waas verdeiltj, mèr oeteindelik höbbe ze de prieze toch weite te verdeile.

De oetslaag:
Jongste deilnemers: 1e: Revi Reijnders (Tik Tok - Kesha)
2e: Arwen Hahnrats (Blijf je vanavond bij mij - Monique Smit)
3e: Op ein gedeildje derde plaats;
Beau Lommen (Ik ben een teenager - Rachel)
Rolien Driessen en Marieke v/d Warenburg (Yeah, Yeah - Junior Songfestival)

Gèt aojere deilnemers: 1e: Lisa Heffels en Dani Ramaekers (Pack up - Eliza Doolittle)
2e: Dani Ramaekers en Jacha Verstraelen ( Eén zomer lang - Nick en Simon)
3e: Evy Hahnrats (Single Ladies - Beyonce)

Ein speciale felicitasie waas d'r väör Jacha Verstraelen en Lisa Heffels. Zoeë waal Jacha als Lisa deeje al väör de viefdje kieër mèt anne Pleebek Sjoow.

Eine dieke merci aan alle artiesten, medewerkers van C.C. De Zaal, DJ Rob, alle vrijwilligers en alle leje van De Koelekop en van De Kwakkert die hun steinke bie höbbe gedrage. Wae häöpe ouch volgendj jaor weer op uch te mòge raekene.
Bekiek hie de Pleebek sjoow plaetjes

Koeleköpke van 't jaor 2010
Leef Kwakkerte en Kwekkerkes,
't Koeleköpke van 't jaor 2010 is gebaore.
Ziene naam is Jesse, gebaore op 11 november óm 19oor25
Jesse is 't zoontje van Sabrina en Marco Timmermans en 't breurke van Sten en Jana.

Wae winse 't kiendje en zien gruëtse aojers väöl gelök, gezóndjheid en plezeer toe names de vastelaovesvereniging de Kwakkert

Bekiek hie 't gebaortekaertje en hie väör de plaetjes van Jesse thoes