Klik bovenin om uch keuze te make:

Archief vervolg

2007 - 2008 Prins Teun I

Klik väör groëter beeldj Klik väör groëter beeldj Eindelik waas 't zowiët, Wae höbbe eine nuuje Prins!!!

Prins Teun I is aafgeloupe zaoterdig 17 november 2007 oêtgerope als de nuuje prins vanne Kwakkert.

Nao een flitsende show mèt väöl spektakel en rauk en eine grooëte groep luuj in witte gewaade, waerdje Prins Teun I väörgesteldj aan 't heitser volk

Teun I zal als lijfspreuk voeren:

"Draan…..,tèl dao mer op"

Teun Verschueren is de nieuwe prins van De Kwakkert in Heythuysen. De 23-jarige Teun werd op zaterdagavond 17 november rond 11 minuten voor 10 in de Zaal als prins van de Kwakkerte geïnstalleerd door wethouder Jeurgens. Hij zal terzijde worden gestaan door de adjudanten Maarten van de Goor, Ruud Hermans en Jo Cillekens.

Teun zit bij vriendengroep VC Draan, een groep jongens en meiden in Heythuysen. Met VC Draan neemt hij al verschillende jaren deel aan de optocht met een carnavalswagen. Verder zit hij met een gedeelte van zijn vriendengroep in de organisatie van de jaarlijkse Mega Summer Party. Bovendien is Teun voorzitter van KVW Heythuysen. Hij voetbalt in Heitse 5 en traint de spelers van de A2. In het weekend is hij ober bij café- zaal Truus Wetemans in Leveroy. In het dagelijkse leven is Teun werkzaam als leraar wiskunde op het Bisschoppelijk College in Weert. Teun recipieert op zaterdagavond 26 januari 2008.

Klik hie väör de foto's, de publikaasie en hie de Proklamasie van Teun I


Daagbook van Prins Teun I

11, 12 en 13 januari. De 30ste Heitser Revu.
Tiedes de generale repetitie merkdje ich al det d'r get sjoeëns aan zoot te kómme. Ich moch mèt de raod van elf, de vorst en de adjudante 3 daag oppe ieërste rie zitte. Wie 't spektakel op vriedig einmaol begós zote wae op 't goje spaor en ginge wae in ein rit door toet zunjigaovendj. Dit kwoom natuurlik door 't thema: Kómme en gaon. De flotte conducteurs as presentatore zorgdje väör ein goje doorstruiming. Zang, dans cabaret en tonieël volgdje elkaar in ein flot tempo op. Wae en zeker 't publiek höbbe óntzettendj genaote. Inkele kieëre waerdje ich ónverwachs in stökskes betrokke. Herstikke sjoeën en gelökkig reageerdje 't publiek good op de improvisaties. Det zaet al eine hieëlehoup: 't publiek mook de aovendj väör zichzelf en väör de artieste. En ich mót ieërlik zègke, det höbbe ze gedaon. Ze höbbe d'r väör gezörgdj det de artieste gruudje en det ederein 't podium op dörfdje. Einmaol op 't podium waas 't moeilik väör de artieste óm te stoppe ómdet 't publiek dök blaef klappe en häör meining bleef gaeve. As Prins vónj ich 't apaart óm zoeë oppe bühne te zitte. Doe kós de artieste bienao aanrake en 't publiek zuut alles waat se duis. 'T keteerke pauze tössedoor kóste wae den ouch good gebroeke. Op vriedig en zaoterdigaovendj zeen wae lang doorgegange in 't Grandcafé en ich moch zelfs oppe taofel gaon staon. Normaal gespraoke staeke ze dao ein stekske väör. Ouch noe deej ederein weer good mèt en blaef 't sjoeëne reacties raegene.

Einmaol thoes blaeve de adjudante nog aeve hange naodet ze mich 't pak oet haje gedaon. Óm 4 oor ginge de lèste minse nao hoes en kós ich mien nèst opzeuke. Op zunjigmörge zeen wae ieërst aafgereisdj nao Thoeër. Hie is Marcel, eine vrindj van adjudant Jo en raodslid Dré, oetgerope as Prins van de Geitebuuk. Ze zeen jaore lang same op vakantie gewaestj, en zeen nog steeds gooj vrinj. Ómdet ze ouch 't 5 maol 11 jaorig jubileum vere zeen wae dao mèt ein delegatie haer gegange. Helaas kóste wae neet te lang blieve, en 't beer smook good. Hienao höbbe wae väör de lèste kieër kinne genete van de Revu en höbbe wae 't good aafgeslaote same mèt de artieste. In de plaatselikke kroege höbbe wae väöl gekaldj en naogenaote van ein sjitterendj weekend.
Meug, mer zeker de meute waerd!


6-1-2008 Waem o waem kumtj d'r drek teväörsjien?
Op 6 januari woor 't den eindelik zoeëwiet. De jeugdprins zooj oetgerope waere in 't Pittt. Vol spanning lepe de raod van elf, versjillendje aojers en natuurlik de jeugd te iesbaere. Waem o waem zooj dalik hie staon mèt de septer en de vaere. Naodet d'r ein film waas gedreidj äöver drie wieze wore d'r inkele zake dudelik. De drie wieze kaeke in alle heuk en gate toetdet ze achter de vluchtdäör ein paar verkleidje jónges vónje. De ieërste waas de nuje Vorst Stan. De twieëdje en de derdje wore de adjudante Joris en Geert. As lèste en belangriekste kwoom jeudgprins Mathijs I nao väöre. 'T mook mich hieëlemaol niks oet waem jeugdprins zooj waere, mer vinj 't waal sjitterendj det ich Mathijs al kin. Icg höb Mathijs namelik getraindj bie de E3, hae haet mètgedaon as hulpleiding bie KVW en ich höb 'm bieles gegaeve in wiskunde. Nao zien oetroping en de nuuedige verplichtinge kós 't fieëst beginne. Mathijs wis van gein ophaoje en same mèt de vorst, adjudante en de raod van elf en zien femilie waerdje 't ein prachtig fieëst. Hossendj, springendj en zingendj ginge wae de zaal door en ich kós 't tempo neet biehaoje. 'T belaofdj noe al eine hieële sjoeëne vastelaovendj te waere mèt zónne enthousiaste jeugdprins.....Tèl dao mer op!!


5-1-2008 PH, praothoes, Prinse hoes, Prinselijke Hóndj
Naodet smiddigs 't hoes waas väörzeen van de nuuedige lampe, borde en vlagge trokke wae mèt ein delegatie nao PH. Ómdet PH mien stamcafé is en ich hie inkele daag per waek koom, vónj ich det wae hie ouch ein bezeuk móste bringe. Dit hoofdje wae Gerard (van PH) mer te zégke en hae organiseerdje get. Hae kwoom same mét de federatie Bóntje Hóndj, waem det ouch moge zeen, biejein óm get te organisere. Ze beslaote det ich as Prins van PH de Prinselikke Hóndj verdeendje. Dj's masterbeerens en sl@tje dreidje geweldjige meziek. Väör jónk en aod, loetster en mètzing of gewuuen sjrieëwe, alles haje ze biezich. Neet allein de delegatie van adjudante, Vorst en Prins, minse van DWN en VC Draan wore ouch dao. Ouch inkele vrouwe van de delegatie, Maarten Peskens mét zien vrouw, plaatselikke kapsters, spelers van de A2 en inkele oosterbure wore aanwezig. Same mèt deze geweldjige groep waerdje 't ein fieëst óm noeëts te vergaete. 'T eine nao 't anger fieëtsnummer waerdje gedreidj, tegels waerdje oet de vloer gebraoke (hie geit 't daak d'r aaf, hie gaon de tegels d'r oet). Halverwaege de aovendj kraeg ich door de federatie, ónherkinbaar aanwezig, de Bóntje Hóndj oetgereikdj. Ich mós noe waal belaove deze te drage tiedens PH aktiviteite, mèt vastelaovendj, as emes van 't käöningklik hoes zooj kómme en as de Bundeskansler van de BRD ter plekke zooj zeen. Nao de oetreiking van deze medalie mèt hóndjskop ging 't fieëst nog door toet laat in de aovendj. Ein fieëst PH waerdig!


4-1-2008 Bouwersbal
Op 4 januari moch ich eindelik weer 't pak aan. Ómdet ich 't zelf sjoeën vinj óm eine vastelaoveswage te bouwe kós ich natuurlik neet wegblieve. Ich bouw zelf al 7 jaor mèt aan de wage van VC Draan en ich vinj 't ouch sjoeën óm op internet te späöre nao anger wages en constructies. Alle deilnemers aan de optocht höbbe ein sjrieve gekraege äöver deze aovendj. Bliekbaar haje väöl miense 't drök want boete groep 17, VC Draan, Gek Zaat en DWN wore d'r mer inkele angere optochtdeilnemers aanwezig. Dit deej gelökkig niks aaf aan de sfeer. Wae höbbe lekker kinne zinge, springe en danse mer väöral kinne lache. Noe de vastelaovendj nog mer 4 waeke deurtj begintj de spanning te stijge. Ederein is vollop bezig mèt de wage of ker en begintj zixh aaf te vraoge waat de concurrentie duit. Gelökkig is 't eine gezónje strijd en guntj ederein det de angere eine sjoeëne wage bouwtj. Det waas ouch trök te zeen op deze aovendj. Alle groepe mingdje zich, en haje eine sjoeëne aovendj.


16-12-2007 receptie Jonk Geweldj
Ouch kraege wae ein oetnuuediging väör de receptie van de Limburgse Kampioen Zate Hermeniekes: Jónk Geweldj. Natuurlik lete wae dit ouch neet aan ós väörbie gaon. Sjitterendj óm te zeen waat jeugd van miene laeftied kintj beteikene väör ein gemeinsjap. D'r wore hóngerde minse nao 't Grand café gekómme óm Jóngk Geweldj te felicitere. Versjillendje kapelle en hermeniekes mer ouch väöl belangstellendje oet 't dörp. Good óm te zeen det d'r eine bandj óntsteid tösse versjillendje kapelle en det ze mekaar allemaol 't bèste gunne. Dit waas väöral te merke aan de sjoeën wäörd die ze mekaar toespeeldje en aan de meziek die ze väör mekaar speeldje. Wae haje as kado ein groeëte foto laote aafdrökke mèt dao op de raod in de kleier van de Prinselikke Hofkapel. (Laes BCL-treffe). Hiebie vertèldje Vorst Bart det hae 't geweldjig vónj óm same mèt Jónk Geweldj mèt te doon op 't podium en det hae van alles haaj genaote. Ich zag nog det wae mèt de raod de concurrentie waal aan dörfdje te gaon en det wae daoróm al nuuj kleier haje gekochtj. Naodet wae de hieële rie mèt jónges en ein paar maedjes haje gefeliciteerdj höbbe wae nog gezellig naogekaldj ónger 't genot van goje meziek van de versjillendje meziekgezelsjappe.


9-12-2007 Pleebeksjow.
Wae ware oetgenuuedigdj óm aanwezig te zeen op de 9de pleebeksjow in 't Pittt. Natuurlik gaove Vorst Bart, de adjudante en ichzelf hie gehuuer aan. En spiet höbbe wae dao neet van gehadj. Wae waerdje kostelik vermaaktj door sjitterendje zang en dans. De dansers, danseresse, zangers en zangeresse waerdje beoeërdeildj op zang, dans, kleier en oetstraoling door ein strenge mer rechtvaardige jury bestaondje oet: Maarten Peskens, Claudia van den Heuvel en Steffie Verstegen. Naeve de optraejes waas 't natuurlik ouch sjoeën en interessant óm te huuere waat de jury van dit spektakel vónj. Ouch waas 't sjoeën óm te zeen wie Roel Timmermans de hieële zaak aanein kaldje wie hae toch väör get extra sfeer zordje. Väör mich waas dit ein good moment óm mich ins tösse de jeugd te minge die ich vanaaf 't KVW neet väöl mieër haaj gezeen. Gelökkig waas d'r jeugd aanwezig mèt versjillendje laeftieje. Hiedoor waas 't eine geslaagdje middig, väör de organisatie, deilnemers en toesjouwers.


Vriedigaovendj 30-11-2007. Woeë gaon wae toch haer?
Drek nao det ich oetgerope waas as Prins, kraege alle leje van de raod eine breef mèt nao hoes. Hie stóng in det ich ein verassing väör häör haaj, en det wae mèt de bös örges haer zoje gaon. Wiezoeë Vals waas bereidj óm ós te vergezelle, al wiste ze neet woeë de böstocht haer ging. Nao ieërst en eurke te höbbe gekaldj en gezónge bie Den Hook stapdje wae de bös in. Neet ich mer Peter Seunis vertèldje in de bös waat die verassing waas en woeë de reis haer ging. Wae zoje vanaovendj te gast zeen bie de oetroping van Preens Geert van de BAM. Op de oefenaovendje kraege wae al te huuere det Geert Pouwels prins zoeë waere op 't werk. Hae zooj det gaer doon mer op ein väörwaarde det de Kwakkert op zien Prinsebal moch kómme en det hae as Prins op de receptie in Heitse aanwezig moch zeen. Zoeë gezag zoeë gedaon. Óm 10 oor kwome wae aan in Wieërt. Nao ein geweldjige proklamasie, mede dankzij Baer, kwoom 't fieëst good los. Ein kapel oet Nederwieërt en Wiezoeë Vals zorgdje väör ein geweldjige sfeer. Zingendj, lachendj, in de polonaise zelfs rennendj (Geert) kwome wae gezellig de aovendj door. Wie wae óm 1 oor mèt de bös trök ginge vónj ich, adjudant Ruud en Saint Emilion, 't nuuedig óm nog effe bie PH aan te gaon. Mèt ein delegatie van z'ón 20 persoeëne trokke wae dao nao binne en kraege de adjudante en ichzelf de waalbekindje halve liter van Gerard. Dit is eine halve liter dae eigelik neet laeg kan, ómdet d'r ederskieër waertj biegevuldj. Óm half 3 waas 't toch tied óm nao hoes te gaon. Ein gooj aafsloeting van 't jaor 2007. Dit waas namelik de lèste kieër dit jaor det ich 't pak aan moch doon. De kómmendje waeke is 't advent en blieftj 't pak dus in de kast.
'T moog d'r weer oet väör 't Bouwersbal op 4 januari.


Zunjig 18 november 2007: BCL-treffe en prinsefoto ophange
Nao ein paar eurkes "geslaope" te höbbe sting 't volgendje al väör de däör. Ruud, Maarten en Jo wore óm tieën oor bie ós óm ein tas koffie te drinke de aovendj nao te bespraeke en mich weer 't pak aan te doon. óm half twelf kwome wae mèt de kapel en de raod biejein bie Den Hook óm nao Grubbenvorst nao 't BCL-treffe te gaon. Ein sjoeën gelaegenheid woeë se ederein good kós lieëre kinne, en det höbbe wae zeker gedaon. Wae stinge lekker röstig achter inne hook van de sporthal en d'r waas väör eier en huidvleis gezordj. Nao de korte optocht in eine aope audi begós 't fieëst inne sporthal pas echt, mèt versjillendje optraejes. Toen Big Benny de bühn op kwaam waas 't pas echt fieëst. As ieërste prins sting ich op de bühn naeve Ben en ginge hieëlemaol los.

Efkes later kwame die anger prinse ouch oppe bühn en same mèt raod en de kapel die väör aan de bühn stinge ging 't draan. Ze wore good te herkinne ómdet ze alles mètzónge. Van de angere kantj wore ze ouch slecht te herkinne, ómdet ze van kleier gewisseldj haje. Herstikke sjoeën óm te zeen. De kapel mèt de colbairs van de raod en de raod mèt de hesjes van de kapel. Dit alles ómdet Baer ziene colBaerke vergaete waas en toch get aan mós höbbe.

Óm zeve oor ginge wae trök nao Heitse óm de prinsefoto op te hange bie Annie en Dré. Hie haje inkele vrunj en vaste klantje zich verzameldj óm d'r ein paar eurkes duchtig taege aan te gaon. De foto hing sjeif, mer det is inmiddels opgelostj. Ich bin gruuets op det plaetske aan de moor bie Den Hook. Edere kieër kiek ze toch efkes nao die aod-prinse en nao häör spreuke.

Óm tieën oor haaj ich waal get hónger en begóste mich de uig dicht te valle. Tied óm mèt mien adjudante nao hoes te gaon. Mam haaj gelökkig mètgedachtj en d'r sting al flot schnitzels mèt frite oppe taofel. Daonao bis se ein stök fitter en toet half ein höbbe wae nog gezellig zitte kletse en väöral väöl gelache. Väör mich waas 't noe al geslaagdj. Twieë super daag woeëvan ich echt höb genaote same mèt mien drie adjudante eine super vorst en sjoeën minse oet de raod en de kapel.


De ieërste waek as prins: väöl reacties.
Inne ieërste waek as prins bin ich hieël verrastj door de reacties van versjillendej minse. Ich wis det ich väöl minse kós, mer det ich zoeëväöl leuke sms-jes, kaarte, blome en complimentjes zooj kriege haaj ich neet verwachtj. Edere daag valle d'r kaarte binne en spraeke minse mich aan. Vrunj, collega's, teamgenaote en bekindje. Ederein vintj 't super. Hiedoor krieg ich nog mieër zin in januari wannieër 't fieëst den hieëlmaol kan los barste. Same mèt ederein, jóng en aod, oet Heitse gaon wae d'r ein sjoeën fieëst van make, det steit noe al vast. Bie deze al bedank ich alle leuke, sjoeëne en spontane reacties. Dit waertj väör väöl minse eine tied óm noeëts mieër te vergaete!

Same gaon wae: DRAAN…….TÈL D'R MER OP!


Zaoterdig 17 november 2007: Prinsebal.
Zaoterdig 17 november waas 't den zoeëver. Nao 10 waeke oefene, smoesjes verzinne en minse väör de gek haoje waas 't den zoeëver. Nog aeve lekker in bad, ein half eurke oppe bank ligke en same mèt pap nao de zaal óm te "wèrke"op 't prinsebal. óm kwart väör acht wore wae aanwezig en de ieërste opmerkinge en vraoge begóste te kómme. Väör sommige minse waas 't dudelik det ich 't neet zooj waere, ómdet ich aan 't wèrke waas. Väör anger minse waas dit 't teiken det ich prins zooj waere.

Óm half nege begós de zaal vol te loupe mèt aod-prinse, de raod, de kapel en anger kwakkerte. Ich haaj mich väörgenaome zoeë normaal mäögelik te doon mer det is moeilik as d'r väöl uig op dich gerichtj zeen. Toen Peter zich ging ómkleie ope bühn ging ich väör 't ieërst mèt drie pilskes en eine sjoes door de glaze däör óm de prins en adjudante van drinke te väörzeen. Inne zaal haje versjillendje minse dit natuurlik gezeen en dachte dus te weite det ich mich ging ómkleie. Helaas. Ich kwaam gewuuen weer trok óm angere minse van beer of fris te väörzeen.

Nao tieëm minute ging ich nog eine kieër de kelder in mèt ein aantal pilskes, ómdet Baer en Peter dorst begóste te kriege en weer kwaam ich trök de zaal in: dus toch neet ómkleie. De derdje kieër waas 't waal raak: mèt ein vol deenblaad (ich lös d'r zelf ouch waal eine) de kelder in óm neet mieër trök te kómme. Ich kraeg 't prinsepak aan, en ich kraeg officieel de scepter, möts en proklamasie äöverhandigdj door inmiddels aod prins Peter III.

Toen ich compleet aan waas waerdje ich väörgestèldj aan de raod van elf as nuje prins. Heerlik óm die sjoeëne reacties te zeen van de minse woeëmèt ze minimaal ein jaor mós gaon optrèkke. Ich vónj det 't lang genóg haaj gedeurdj en det de minse noe waal móchte weite det ich prins zooj waere. Flot de monnikkepakke aan, óm de bühn op te sjufele. Toen de muziek einmaol dreidje ging alles vanzelf. Ich waerdje nao väöre gedrage, op slaag drie ging mien pak oet en de möts op en op slaag vief dreidje ich mich óm, as prins Teun I. 't Laek asof de zaal óntplofdje. Väöl minse begóste te klappe en te juiche mer de reactie van VC Draan en DWN vergaet ich noeëts mieër. Waat ein óntlading. Naodet wèthaojer Juergens mich de scepter haaj gegaeve kwoom de proklamasie. Deze kindje ich bienao oet miene kop. 't Enige woeë ich raekening mèt mós haoje waas röstig laeze en wachte as de zaal te ónröstig waas. Dit waas neet nuuedig want ederein heel zich stil óm te loestere en lachdje en sjrieëwdje as det mäögelik waas. Ein sjoeën geveul. Toen ein hieël belangrieke verrichting! Ich ging mien adjudante nao väöre rope. Ieërst Ruud Hermans: eine goje vrundj woeëmèt ich in 't bestuur van KWJ zit en woeëmèt ich voetbal in 't viefdje. Toen Maarten de Goor: ouch eine goje vrundj woeëmèt ich dök aan de vastelaoveswage bouw en woeëmèt ich edere maondjig kaart.

As leste Jo Cillekens: mien groeët väörbeeldj sinds wae in 1996 same prins zeen gewaestj. Daonao drek de zaal in óm d'r mèt ederein ein groeët fieëst van te make. En of det gelöktj is. Of 't noe oppe taofel, oppe bühn of gewuuen oppe vloer waas: ederein ging oet zien daak. Det meuktj 't väör eine prins hieël gemaekelik óm te gaon en lekker gek te doon. Nao aafloup zeen wae nog eier mèt spek gaon aete. Ich wis neet det d'r zoeëväöl minse bie ós in de kamer kóste zitte. Zeker vief en vieërtig minse höbbe nog lekker ein eike gegaete en ein fles beer gedrónke väör det ze óm drie oor nao hoes en nao bèd ginge. Mien adjudante, de vorst, minse vanne raod, maxet, vrunj en bekindje. Waat eine aovendj: eine óm noeëts mieér te vergaete.



2006 - 2007 Prins Peter III

Klik väör groëter beeldj Peter werd zaterdag 11 november 2006 rond 11 minuten voor 10 als prins van het seizoen 2007 geïnstalleerd door wethouder Smolenaers in Cultureel Centrum "De Zaal".

De 42-jarige prins is getrouwd met Marion. Peter zal het komende 'vastelaovessezoen'als adjudant terzijde worden gestaan door Henk Hoeijmakers, Ben Levels en Cor Menting.

Peter bespeelt al 11 jaar de tuba bij de in Heytse en omgeving bekende joekskapel "Wiezoë Vals". Daarnaast is hij lid van de commissie muziek van de vv "de Kwakkert"en secretaris van "De Vrienden Rond L'Union".

In het dagelijkse leven is Peter werkzaam als KAM-manager van een producent van bouwstaal in Roermond.
Peter III zal als lijfspreuk voeren:

"Vastelaovendj....., det mósse preûve"