Archief
2023 - 2024 Prins Joost I en Jeugdprins Deef I
De klak ane kantj, abnormaal oet de bandj
Joost Simons is oze nuje Prins. Op zaoterdig 18 november, nao 't zeen van 't inmiddels hilarische filmke wat eder jaor luutj zeen wie de Prinse Keuze Commissie tot ein keuze is gekóme, waerdje Joost gepresenteerdj aan de Heitser vastelaovesveerders. Ziene naam waerdje al jaore geneumdj, mer dit jaor waas d'r den toch écht aan de bäört. Joost is geine onbekindje in 't Heitser vereinigingslaeve. Väöraanstaondj lid van de Stichting Borebroeloft, hoofdleiding van Kinjer Vakantie Werk en achtergrondj-zènger bie De Abnormale, óm mer 'ns get te neume. Nao ómzwervinge door 't landj woeëntj Joost sinds inkele jaore weer in Heitse.
In 't dageliks laeve zitj Joost tösse de pille en vaccins en in die hoedanigheid is d'r wèrkzaam bie farmaceut GSK in Brussel.
Naeve det d'r gek is op vastelaovendj is d'r zeker zoeë gek op zien vriendin Britt van der Loo, die ouch hielemaol niet vies is van vastelaovendj. Ein sjoeën stel det dit jaor väörop geit in de Heitser vastelaovendj.
Gedorendje 't seizoen waere Joost en Britt óngersteundj door eine bak aan vastelaoves-ervaring.
Zien adjundanten zeen namelik Mathijs Lenders, Jim Diesch en Lars Frenken.
As liefspreuk zal Joost veure: 'De klak ane kantj, abnormaal oet de bandj'.
Voetbal is mien laeve, mèt vastelaovendj alles gaeve
Op zaoterdigaovendj 18 november, tiedes ós Prinsebal, waas uiteraard ieërst de jeugd aan de bäört. Ónger leiding van de nuje jeugd-commissie waerdje Deef I as dé Jeugdprins van Heitse oetgerope.
Dae lach op zien snoet zag genòg; ziene druim óm 'ns Jeugdprins te waere is oetgekomme. Deef haet 't vastelaovesblood neet van vraemdje. Zeen vader waas hieël lang gelaeje Jeugdprins in Heitse en get minder lang trök groeëte Prins.
Deef is de jóngste telg oet de familie Schreurs. Zeen aojers, Rob en Mariëlle en zeen breurs Stef en Bent zulle Deef gedorendje 't seizoen natuurlik helpe woeë nuuedig.
Edere daag fietstj Deef nao sjoeël in Häör en as d'r neet nao sjoeël hooftj haet d'r meistal gruuen knieje van 't voetballe. Det gruuen steit 'm dus good. Jeugdprins Deef I ziene spreuk is: 'Voetbal is mien laeve, mèt vastelaovendj alles gaeve'. Gruuets haet d'r zien 2 adjudanten gepresenteerd. Vanzelfspraekendj zeen det zien bèste vriendin Saar Tummers en zien voetbalbestie Stan van Horne. Saame gaon ze GAAS gaeve deze vastelaovendj.
Mer Deef waas neet de enige dae gepresenteerdj waerdje aan de Heitser minse. De nuje Jeugdvorst Maan Claessen zal Deef I äöveral woeë ze kóme netjes aankondige. En waat te dinke van de nuje Jeugdraod. Allemaol jonges en maedjes oet Heitse die 't gruuen van de Koeleköpkes laote straole.
De receptie van Jeugdprins Deef I en Prins Joost I waertj gehaoje op zaoterdig 3 fibberwarie 2024 in De Bombardon.
Op zaoterdig 20 jannewarie 2024 organiseerdje vv De Kwakkert eine kei-leuke kinjermiddig in De Bombardon in Heitse.
Vanaaf 14.00 oor dreijdje DJ Barto vastelaoves-plaetjes en woorde d'r sjieke artieste.
Saame mèt dien vriendjes en vriendinnetjes, pap en mam of opa en oma, same vastelaovendj vere, en jao, verklèdj, want de sjoeënst verklèdje wintj eine pries. Uiteraard waas Jeugdprins Deef I ouch d'r bie.
Koeleköpke van 't jaor
Väörige waek zeen Prins Joost I en Jeugdprins Deef I op bezeuk gewaesj bie ‘t Koeleköpke van ‘t jaor, Duuk. Duuk is ‘t zoontje van Sjoerd en Milou Evers en ‘t breurke van Fem. Uiteraard waerdje Duuk duchtig in ‘t zunke gezatte en waerdje d’r geridderdj door ós Prinse.
Wae winse Milou, Sjoerd, Fem en Duuk hieël väöl geluk toe.
2022 - 2023 Prins Marcel I en Ieërste Jeugdprinses Femke I
Väöl minse in Heitse dachte 't te weite. Eine jubileum prins kumptj oet de raod van ellef. Mer tösse dinke en zeker weite zitj soms ein versjil. Deze kieër haaje ze geliek; hae kwoom inderdaad oet de raod van ellef, en waal in de persoeën van Marcel Beijnsberger. Prins Marcel I is op zaoterdig 12 november oetgerope as zèsje jubileumprins van De Kwakkert.
In 't dageliks laeve is Marcel getrouwdj met Yvonne en samen höbbe ze twieë zoons; Coen en Tijs. Marcel werktj bie Holbox Shop Direct, woeë d'r d'r väör zörgtj det de kartonne displays netjes en oppe tied bie de klantje terecht kóme.
In ziene vrieje tied is d'r lid van 't bestuur van de vastelaovesvereiniging en väörzitter van de PR-commissie.
Wie 't huuertj regeertj Marcel I mèt eine korte en krachtige liefspreuk; 'Drökker waertj 't neet!'.
Bob Eijmael, Leon van der Heijden en ziene aodste zoon Coen, zulle 'm de ganse vastelaovendj biestaon as zien adjudante.
Zaoterdigaovendj waas d'r eine échte primeur te belaeve op 't podium bie de Bombardon.
Allerieërst waerdje d'r eine gloednuje jeugdraod aan de Heitser minse väörgesteldj. Daonao noom Sarah Heynen de scepter äöver van Vorstin Emma. Sarah is de twieëdje Vorstin van de Koeleköpkes. Mer toen…
Naodèt 57 jeugdprinse de scepter höbbe gezweijdj äöver 't Koeleköpkesrieëk, waerdje Femke I oetegerope as allerieërste Jeugdprinses. Gans gruuëts sting ze op 't podium.
Femke fietstj eder daag nao Häör nao sjoeël. En as wae de proklamasie moge geluive is det edere kieër weer ein hieël belaevenis. In häöre vrieje tied goejtj ze ein belke bie de C1 van handjbalvereiniging VIOS.
Femke I haet uiteraard de steun van häöre Jeugdraod. Mer ouch van häör adjudante. Femke haet Pien Verkoulen en Semm Vestjens gevraogdj of ze häör adjudante woje zeen. En as echte gooj vriendinne zagte zie natuurlik geliek 'jao'.
Femke is de jóngste dochter van Roel Verheijden en Monique Vermeulen. Gein onbekindje gezichte in de Heitser vastelaovendj. En as de jóngste dochter bès, höb se natuurlik ouch nog eine aojer zöster. Des is Fleur.
Mirte & Rianne winnaars HVK 2020
Eine kieër per jaor waertj 't biljaar bie café Den Hook neet gebroektj woeë 't eigelik väör bestumdj is. Den duit 't namelik deenst as podium. 'T podium väör 't Heitser Vastelaovesleedjes Konkoer. Heitser artieste klumme oppe biljaar en gaeve zich dao gans mèt eine door häör zélf gesjraeve schlager. Waas anger jaore nao alle optraejes waal dudelik waem as winnaar oet de bös zooj kóme, dit jaor waas det absoluut neet 't geval. 'T Bleef spannendj toetdèt Prins Bart II oetsloetsel goof. Rianne & Mirte bleke de meiste puntje vanne jury gekraege te höbbe met häör leedje 'I love Alaaf'.
Mer det 't eine 'close finish' waas bleek waal oet 't feit det de jury lang nuuedig haaj óm tot ein oordeil te kóme. Mèt dit leedje höbbe Rianne & Mirte aoverigens ouch al de halve finale van 't LVK bereiktj. De dames tömmere flink ane waeg. Laote we haope det 't winne van het Heitser Vastelaovesleedjes Konkoer eine opstap is nao nog groeëtere successe. Angere deilnemers wille wae hertelik bedanke väör häöre inzet en houpe det zo ouch volgendj jaor weer vanne partie zeen.
2019 - 2020 Prins Bart II en Jeugdprins Stan III
Ziene naam galmdje al jaore door 't Kwakkerte-rieëk en hae haet d'r lang op mótte wachte. Mer op zaoterdag 23 november waas 't hae den toch ane bäört; Bart Boonen waerdje oetgerope as de 65e Prins van ós vereiniging.
Nao ein sjoeën filmpke waerdje Bart II op ein 'Casa de Papel'-achtige meneer ane Heitser minse gepresenteerdj. Of dees meneer van presentere get te make haet mèt zien dagelikse wèrk bie de plisie weite we neet, mer toevallig is 't waal. Bart is getrouwdj mèt Loes die missjien nog waal gekker van vastelaovendj is as Bart zelf. Want asse oppe 11e vanne 11e jaorig bès, den mós se waal roeëd-gael-gruuën blood höbbe.
Inne Heitser gemeinsjap is Bart actief as väörzitter van Kinder Vakantie Werk en houwtj d'r bie Joekskapèl Jonk Geweldj duchtig oppe kist, want dao speeltj d'r de trom of de dieke trom. Wie 't huuertj regeertj Bart II mèt eine korte en krachtige liefspreuk; 'Vastelaovendj, det boeitj!'.
Rik Caris, Mathijs Lenders en Bent Derks zulle Bart 't ganse vastelaovendj-seizoen assistere as zeen adjudante. Vastelaoves-veerders pur sang.
De receptie van Prins Bart II en Jeugdprins Stan III waertj op zaoterdigaovendj 15 fibberwarie gehaoje inne Bombardon in Heitse.
2018 - 2019 Prins Koen I en Jeugdprins Lars II
Väöraafgaondj aan 't oetrope waerdje 't spelleke "Waem waertj 't" gespeeldj. Prinswaerdige kandidaten passeerdje de revue. Nao edere vraog veel d'r eine aaf en oeteindelik bleef d'r eine äöver. Koen I waerdje toet vastelaovesprins 2019 gekroeëndj. Koen I (Stoop) haet al dökker inne gezèt gestange, mer nog noeëts op dees meneer. Koen priktj d'r namelik mèt enige regemaat ein guulke in bie 't ieërste van Veritas in Neeritter. Wie d'r det de kómendje maondje geregeldj haet mèt ziene trainer weite we neet, mer det zal lichtelik goodkóme.
As d'r neet in Neeritter binne de lieëne steit, steit d'r in Heitse naeve de lieëne as trainer vanne JO19-1.
In 't dageliks laeve waertj Koen biegestange door partner Karin Corstjens en weite we det d'r äöverdaag hieël väöl koffie drinktj. Koen wèrktj namelik bie DEAC Koffie Experts en rietj dao half Nederlandj väör door. Dae koffie zal de kómendje maondje waal get minder waere…
As adjudanten haet Koen gekoze väör eine mix van ervaring en jeugdig talent. Roy Peskens, Nick Meerts en Frank van Horne zulle Koen óngersteune, dao woeë nuuedig. Regere duit Koen ónger ziene spreuk: 'Boete de däör balle, mer in Heitse duchtig knalle'.
Op zaoterdigaovendj 23 fibberwarie zal Prins Koen I receptie haoje inne Bombardon in Heitse
2017 - 2018 Prins Bas I en Jeugdprins Noud II
't doordje allemaol mer lang vonj oze nuje Prins. Al maondje haaj d'r zien tong aaf mótte biete. Nemes móg 't weite, toet vandaag… noe moog ederein 't weite. Bas I Peeters, dé nuje Groeëte Prins 2018 vanne Kwakkert.
Nao ein echte speelfilm kwoom Bas I achter de speciaal väör dit Prinsebal gemaakdje gerdiene oet. Bas Peeters, 38 jaor, in 't dageliks laeve maatsjappelik wèrker, is getrouwdj mèt Cyrille. Same höbbe ze twieë dochters, Lynn en Isis. Boete 't feit det Bas eine echte vastelaovendjveerder is, kinne de minse Bas as lid vanne vrijwillige brandjwaer in Heitse. En det die men fanatiek zeen zoge wae väörig jaor op aswoonsdig. Tiedes de Mès, wie ederein mèt ein askruutske väör de kop inne kèrk zoot, waas d'r in eine kieër eine houp tumultj. De brandjwaer waerdje opgepieptj. Diegene die ómkeeke kóste nog net de rök van Bas zeen. Zoeë snel wie de brandjwaer rendje Bas de kèrk oet, "duty calls".
As zeen toewijding as Prins net zoeë groeët is, steit Heitse get te wachte de kómendje vastelaovendj.
Bas is de 63e Prins vanne Kwakkert en zal äöver Heitse regere ónger ziene liefspreuk: "Mèt dees daag kan 't ós neet heit genóg waere."
Uiteraard waertj d'r biegestange door Cyrille, mer ouch door twieë adjudante. Paul Weerts en Tyronne Ubachs zorge d'r de komendje vastelaovendj väör det Bas I edere aovendj allik aan thoes kumptj.
2016 - 2017 Prins Martin I en Jeugdprins Twan I
Martin Schreurs geit 't kómendj jaor väörop inne polonaise. Eine Prins mèt ervaring…, nou ja…ervaring? Väörig jaor waas Martin dé Prins van ziene vrunjegroep de B&A-boys. Dao haet d'r efkes móge preuve aan 't Prinssjap det toen mer eine daag doordje. Dit jaor doortj 't seizoen get langer!
In 't dagelikse laeve waertj Martin biegestange door Inge Mutsers woeë d'r kómendj jaor ouch nog mèt geit trouwe. Ein drök jaor dus väör Martin en Inge.
Gelökkig kinne ze steune op zien adjudante Krijn Peeters, Sven Henderickx en Joris Driessen. Van Joris waertj gezag det d'r de knapste jóng van Heitse is. Dus ouch väör de dames is d'r dit jaor zat te belaeve bie De Kwakkert.
Martin geit väörop ónger ziene liefspreuk: "Noe neet ónger de lat, mer hieël Heitse plat."
Redelik dudelik; Martin is keeper van 't ieërste vanne voetbalclub woeë d'r ouch trainer is vanne A1. In de weekende is Martin regelmaotig te vinje bie zien vrunj van de B&A-boys en van v.c. DWN.
As Martin geit wèrke riedtj d'r nao DHL in Beringe woeë d'r Process Engineer is.
Det de leje vanne Raod van Elluf ’t erg drök höbbe waas al langer bekindj. Opbouwe, aafbraeke, väöl wèrk inne eige commissie en gank zoeë mer door. Toch weerheel det se neet óm ouch thoes wèrk te verzètte. ’T resultaat; ein ware gebaortegolf.
Wie gebroekelik waere alle kiendjes van leje van ós vereiniging door de Prins geridderdj. Ómdet ’t dit jaor mer leefst vief kieër pries waas, waerdje veer vanne vief tegeliekertied, door inmiddels Aod-Prins Niels I, óngersjeije. Guus Geukenmeijer waas al ierder óngersjeije en ontbriktj oppe foto.
2015 - 2016 Prins Niels I en Jeugdprins Jente I
Op zunjig 22 november 2015, zoe rondj de klok van drie, leep de spanning duchtig op in De Bombardon in Heitse. Achter de coulisse stinge twieë kaerels die dalik oetgerope zoje waere as Jeugd- en groeëte Prins van De Kwakkert. Als ieërste waas 't de bäört aan de Koeleköpkes. Ónger toezeendj aog van de jeugdraod, kwoom Jente Voermans nao väöre als häöre nuje Jeugdprins. Jente is de zoon van Roland en Karin Voermans en breurke van Daphne. Mer Jente I haaj ouch nog eine waereldprimeur väör Heitse. Väör 't ieërst staon d'r twieë vrouwelikke adjudante naeve 'm. Anke Rutten en Jade de la Bretoniere zulle Jeugdprins Jente I gedorendje de ganse vastelaovendj assistere woe ze mèr kinne. Jente zal äöver 't Koeleköpkes-rieëk regere ónger ziene liefspreuk "Mèt dees twieë maedjes aan mien zie, bèn ich van de partie".
Daonao waas 't de bäört aan de groeëte Prins! Ónger leiding van de nuje Vorst Toine I, is 't Niels Joris dae dit jaor de steek mèt vaere moog drage. Niels is getrouwdj mèt Marlon en same höbbe ze drie wichter, Jonah, Luca en Wiebe. Leiding gaeve zitj Niels in 't blood, want äöverdaag zweitj Niels de scepter bie metaalverwerkingsbedrief De Smidse. Niels is actief bie de voetbalclub als leider van de E1. Verder meuktj d'r deil oet van de vrunjegroep Altied gèt! Niels I zien adjundante zeen John Vestjens, Paul Schreurs en Patrick Joosten. Ónger ziene liefspreuk "Vastelaovendj, iezersterk" zal Prins Niels I same mèt Jeugdprins Jente I dök väörop gaon in de polonaise en is De Kwakkert klaor väör weer ein sjoeën vastelaovesseizoen.