Nuuts
Jeugdprins Sem I en Paul I, ós Prinse van 2026
In ’t ieërste weekend nao de 11e vanne 11e is ‘t ’n good gebroek óm de nuje Prinse van ’t kómendje vastelaovesjaor oet te rope. Dit jaor dus op 15 november.
Als ieërste geit alle aandacht nao de Jeugd. Dao waas ’t Sem I Reijnders dae, nao ’n jaor oefene bie de Jeugdraod, noeë as Jeugdprins väörop moog gaon bie de Heitser Jeugd. Det de sjoeël, ‘t voetballe en de sjötterie de kómendje waeke op ’n lieëger pitje staon, bliektj waal oet Sem ziene spreuk; “Sjoeël, voetbal en sjötterie de balle, wae gaon dúchtig knalle’.
Same mèt ‘nne kersverse nuje Jeugdraod waermdje de jónges en maedjes de zaal good op väör ’t oetrope van de groeëte Prins.
Rondj de klok van half elluf waerdje bekindj det Paul I Suntjens ’t kómendje jaor väörop in de polonaise luptj. Det wae ouch dit jaor weer kinne tèlle op ’n goje, bliektj waal oet Paul ziene spreuk “Hieël Heitse oppe kop, raeken dao mer op".
Det ‘t, naodèt ós Prinse bekindj wore, nog lang gezellig en drök bleef in de Bombardon, moog dudelik zeen.
De receptie van Jeugdprins Sem I en Prins Paul I waertj gehaoje op zaoterdig 7 fibberwarie 2026 in De Bombardon.
Heitser Vastelaoves Mès
Vastelaovendj is neet allein ein fieëst van roeëj naze en gruuen pruuke. Vastelaovendj is mieër den det. Vastelaovendj geit väöraaf ane vastetieëd. Vastelaovendj is 't fieëst van verbonjeheid. Ein moment óm toet bezinning te kóme. Ein fieëst van tradities. En ómdèt wae as vastelaovesvereiniging hechte aan tradities, moog de vastelaovesmès zeker neet ontbraeke.
Väöraafgaondj aan de vastelaovendj gaon we mèt z'n allen nao de kèrk. Dit jaor doon we det op vriedig 6 fibberwarie 2026, óm 18.30 oor. Meneer pestoeër zal dao de staeke zaegene en we gaon baeje väör alles wat ós bezig hiltj.
Aansloetendj aan de mès is 't Kwakkert Wasse bie 't kèrkplein
Askruutske haole is op Woonsdig 18 fibberwarie 2026 óm 17.30 oor