Prins
Nuje Kwakkert Prins 2024-2025
Vastelaovendj, jónk gelierdj
In eine drökke zaal waerdje op zaoterdig 16 november Noud van Lier as de 68e groeëte Prins van v.v. De Kwakkert oetgerope. Ziene naam waas ein van de name die de lètste waeke al rondj zonge in ’t dörp, mer zoeë as edere Vorst taege ziene nuje Prins zaet; ‘minse kinne ’t waal dinke, mer zeker weite doon ze ’t noeits’.
Noud is 24 jaor jónk en in ’t dagelikse laeve jurist bie de gemeindje Cranendonk. Ze mótte ‘m de pis dus neet lauw make. In ziene vriee tied haet d’r ’t nog drökker as op zien werk. Voetballe bie ’t derdje van Heitse, dragendje kracht van ’t Pleinfestijn, lid van de B&A-Boys, in ein commissie van ’t OLS 2025 en zoeë zeen d’r nog ein deil zake woeë Noud zien steinke aan bie dreugtj.
Ziene spreuk, ‘Vastelaovendj, jónk gelierdj’, is ‘m op ’t lief gesjraeve. Noud was namelik in 2013 de Jeugdprins van Heitse. Aan ervaring dus gein gebrek. En det Noud eine man van zien waord is bliektj waal. Wie d’r namelik jeugdprins waas haet Noud mèt zien toenmalige adjudanten aafgespraoke det as ein van häör oeits groeëte Prins van De Kwakkert zooj waere, ze ’t weer mèt zien alle zooje doon. Zoeë gezag, zoeë gedaon. Joost Winkelmolen en Rik Peters höbbe Noud in 2013 óngersteundj en zeen ouch ’t kómendj jaor Noud zien adjundanten. Mer ’t trio adjudanten is natuurlik neet compleet zónger Noud zien eige broor Tom. Dit veertal steit garant väör eine sjoeëne vastelaovendj woeëbie de Raod van Ellef zich nog duchtig achter de oere kumptj kratse wille ze dees men bie haoje.
De receptie van Jeugdprinses Lynn I en Prins Noud I waertj gehaoje op zaoterdig 22 fibberwarie 2025 in De Bombardon.
